好麵棧 (Closed)

見到元朗廣場附近新開咗依間主打車仔麵嘅鋪頭，見好耐都冇食車仔麵，於是同朋友黎幫試下。環境幾企理，左邊係枱，右邊係廚房同清潔嘅地方，員工招呼唔錯。一望餐牌，就見到有好多選擇，簡直令人眼花瞭亂，樣樣都想食~ 揀嘅次序如下: 麵底-->至少2款餸-->湯底-->飲品-->小食，上菜好快，仲要係熱辣辣嘅~我最後粗粗地叫咗牛腩+豬軟骨公仔麵，牛腩燜得好軟，仲有啖啖嘅腩汁味，果然值得推薦，而豬軟骨就骨肉分明，好有咬口。朋友就叫咗五香肉丁+紅腸米線，估唔到肉丁食極都仲有，而紅腸嘅厚度適中，好足料。放調味料個度放咗一盒辣菜甫，同麵一齊食開胃，又唔會話太辣。佢嘅奶茶都好出色，好滑又有濃濃嘅奶香味，下次一定要再黎試下特飲奶茶紅豆冰~