牛大人台灣火鍋吃到飽 (銅鑼灣廣場二期)

Open Now

Now Closed

前幾日同朋友二人黎咗食牛大人晚餐火鍋，入面啲座位好寬敞，坐得舒適。今次揀咗澳洲極上和牛套餐，湯底就牛大人秘方麻辣鍋中辣。呢個套餐有多款肉類可以點，而我地就最期待牛小排、和牛M5牛肩卷同埋期間限定嘅北海道十勝豚！手機落單後幾分鐘就上菜，好有效率。牛肉脂肪分布平均，沾埋牛大人特製醬汁食非常開胃。個湯底辣得黎帶有麻香，除咗肉類之外其他配料就咁食都有湯頭濃郁味道。蔬菜同丸類配料可以自己出去夾，都有好多選擇，包括少見嘅蕃薯葉，香芋貢丸等。個貢丸係我每次同朋友黎都必食嘅！除咗有豬肉香外，佢有粒粒芋頭係入面，令到整體口感鬆軟啲唔會太硬實。海鮮類我地就試咗海蝦、鯛魚片等。入口冇海鮮雪藏腥味，肉口感紮實而有海鮮甜味。建議食多咗紅肉嗌吓魚片調劑番，因為佢清爽得黎令人好有胃口啊！我地有試牛大人嘅黑糖珍珠鮮奶，每人加$25就有，同出面手搖店嘅一樣咁靚，有黑糖掛杯紋路，打卡一流。牛奶同黑糖比例岩岩好，食緊辣火鍋嘅時間飲一飲就好解辣同解渴，啲珍珠煲得香甜煙韌，不經不覺就成杯飲哂。下次有朋友聚會都會想黎再食啊！環境舒適，上餐速度又快，大家都食得開心。