火鍋撚 (日富里百好大廈) (Closed)

筆者好鍾意食台式火鍋鍋底嘅鴨血同豆腐，見到火鍋撚星期一至四可以無限追加，就即刻book枱去試。今次試嘅係西環分店，座位闊落，長卡位就算嗌多啲嘢食都擺得落。湯底向店員落單，食物飲品就自己qr code落單，好方便。叫咗半份細嘅安格斯牛肉，肉質好腍，但最初期望係嗰個晾衫架嘅擺盤，原來要嗌一份先有，下次識嗌喇🥲即炸響鈴幾高質，有牌仔寫明淥三秒就夠，聽佢話淥三秒就上嚟點個酸甜醬，果然好食～手工丸類叫咗拼盤同半份龍蝦湯牛丸，但好似嚟咗黑松露牛丸，爆出嚟嘅湯汁似黑松露蘑菇湯，都幾好食，其他丸類同海鮮滑都不過不失，好彈牙。蔬菜類叫咗個綜合籃同埋半份紫淮山，綜合籃嘅款式就大路野：粟米、娃娃菜、菜心苗等，有大大塊黑木耳幾爽口；紫淮山反而幾有驚喜，腍腍地似紫薯但又冇咁滯。呢度仲有甜品送，可以揀仙草芋圓或者腐竹糖水沙冰，食到咁飽我就揀咗沙冰，用咗古代高腳杯裝住，賣相討好，味道亦都幾清甜。