Video
Read full review
2010-05-03
38 views
之前都有哩過食晚飯，環境同食物都覺得唔錯，見佢賣廣告做緊點心任點任食下午茶，$50位試得過喎，即刻拉埋同事星期六收工過哩試吓先！星期六，2:00-4:00pm，$50位（要兩位起），，但另收茶錢$8位，1-4人收一碟花生錢$10（4-8人收兩碟，如此類推），再加埋一，所以同同事兩個人，埋單就變咗每人$70喇！如果有番咁上下食量嘅人就梗係抵到爆，否則，咁嘅價錢同你出去普通酒樓飲餐茶差唔係好多。不過話說回頭，如果要係度飲茶食點心，同樣以星期六下午茶，散叫計，小點$11.8，中點$14.8，大點$17.8，所以個任食下午茶一個人食到3-4籠嘢都叫翻本喇！因為任點任食關係，1:45pm上到哩見到人山人海排隊攞籌，有個疑似闊太驚蝕底攞得慢好似去咗世博睇中國館咁想搶籌，話晒依度係香港，大家都係香港人，使唔使呀？側邊仲有D外國遊客添，失禮死呀！個疑似闊太攞咗籌仲猛咁成日問有位未呀？仲未輪到我哋？唉，製造嘈音！大堂裡面雖然枱排得比較逼，但我哋兩個人都係比一張枱，絕對無搭枱嘅事，所以坐得舒舒服服，人手足招呼都好好，而且，3:30pm截單，3:20pm左右佢哋會有人主動問你仲有無嘢想加想要，唔會怕你再叫多
因為任點任食關係，1:45pm上到哩見到人山人海排隊攞籌，有個疑似闊太驚蝕底攞得慢好似去咗世博睇中國館咁想搶籌，話晒依度係香港，大家都係香港人，使唔使呀？側邊仲有D外國遊客添，失禮死呀！個疑似闊太攞咗籌仲猛咁成日問有位未呀？仲未輪到我哋？唉，製造嘈音！大堂裡面雖然枱排得比較逼，但我哋兩個人都係比一張枱，絕對無搭枱嘅事，所以坐得舒舒服服，人手足招呼都好好，而且，3:30pm截單，3:20pm左右佢哋會有人主動問你仲有無嘢想加想要，唔會怕你再叫多D而扮唔聲唔聲！
等咗15-20分鐘左右就有位，兩個人吹吓水就過咗啦！好嘢，埋位喇，真係好肚餓。任點任食點心紙，有27款點心，3款迷你炒粉麵，3款燒味湯粉麵，我哋得兩個人，粉麵飯梗後唔使諗啦，主攻點心架喇，第一輪一口氣叫咗8樣嘢，蜂巢芋角、千島蝦春卷、南瓜粟米粥、香煎蘿蔔糕、蜜汁叉燒腸、皮蛋叉燒酥、翡翠菜苗餃同蟹籽燒賣，因為每樣嘢上枱，個樣都熱辣辣，咬落仲幾燙口，而且由落單到有得食都要等十分八分鐘，所以都覺得佢係即叫即整嘅。好似個千島蝦春卷咁，哩到咬落真係好熱，外邊整春卷多數都炸定一大盤，有人叫就夾幾條出去，哩到就算唔凍都只係微暖，故此，雖然係任點任食，都見到酒樓都想做好D水準，無話偷懶整定晒。
除咗新鮮熱辣做出哩之外，味道都好對辦：
蜂巢芋角，外層「蜂巢」鬆香，內層就芋頭粉香；
千島蝦春卷，真係想再添食架，每條春卷裡面都有大大隻蝦，外皮炸得甘脆，佔D千島汁醬，醒胃之餘，又減低個油膩感；
南瓜粟米粥，潮流興無添加，依個係添加版，添加咗冬菇絲，多份菇香，變得無咁「寡」，而本身嘅粥底夠綿，南瓜又夠，入晒味落個粥度，粟米就增加個咬口感；
香煎蘿蔔糕，麻麻哋，蘿蔔味唔濃，咁就已經影響晒個印象；
蜜汁叉燒腸，一般，個腸粉皮削咗D，唔算滑，所以叉燒做得好都失晒分；
皮蛋叉燒酥，焗得酥皮好香，叉燒餡又做得好味，不過，就唔係好覺有皮蛋囉？
翡翠菜苗餃，餃皮晶瑩，夠薄又唔黐牙，菜苗刴得夠細碎，包得冚一冚，令到菜苗餃漲卜卜，正！
蟹籽燒賣，都唔錯，無乜肥豬肉。
臨尾再叫個步步千層糕同香麻糖不甩當甜品，點知兩個都話賣晒，得番個精選甜品，精乜鬼選丫，查實就只不過紅豆沙，唉，都好啦，無想食嘅甜品都係有D失落！
Post
