禮記 (Closed)

今日同個朋友去將軍澳食飯。點解會去果邊食飯？因為之前見到啲介紹，將軍澳嘅禮記有個企起身嘅嘅肉絲脆麵。睇到時覺得好得意同好吸引，所以就去咗囉。一入到餐廳，地方寬敞舒適，感覺相當好。作為一間中餐館，當然係先叫茶啦，我哋揀咗比較特別嘅玫瑰荔枝茶。茶杯典雅，茶味清香。瑤柱魚滑上湯浸時蔬，睇落好普通？都唔算㗎。除咗明顯見到嘅魚滑同小棠菜，仲有瑤柱絲、冬菇粒、同埋薑絲。上湯味濃，魚滑打牙鮮甜，再加上冬菇粒帶嚟嘅口感，整體來講，雖然係普通嘅中菜，但絕對係好好味嘅菜式。杭州東坡肉，我特登點嘅。東坡肉雖然係好肥好邪惡，但絕對係唔會成日食嘅菜式，所以一次半次，絕對唔會過分。東坡肉肥瘦分明，入口即融，而且汁醬爽甜唔膩，減輕咗東坡肉嘅肥膩感。奉勸大家，叫得東坡肉，就唔好怕肥，記得要連埋肥肉一齊食先好味嫁。銀芽肉絲脆麵，是日最期待嘅菜式。企起身嘅肉絲脆麵，真係好正，影相打卡一流。當你影好相喇，店員就會幫你淋上汁醬同為依個肉絲脆麵解體。鐵板上嘅原故，所以脆麵落返平面，淋完汁醬，都好熱返，唔會話入口凍冰冰。汁醬調味唔錯，就算唔係諗住影相打卡，都值得點嚟食㗎。