泰邊爐 (Closed)

天氣凍咗梗係去打邊爐啦~今次同閨蜜去。佢話之前食過覺得唔錯，而家轉咗新menu想去食多次。餐廳冷氣好足，就算枱枱都烚下烚下都唔會好焗。餐廳播住泰國歌，四圍嘅電視又播住泰國廣告，氣氛十足。佢有兩個自助飲品櫃， 總有一款啱你。除咗自助醬料，仲有任食泰國小食同甜品。每位$198有個鍋，仲有任食配料，可以揀雞煲或者就咁湯底。我哋叫咗個椰子雞湯，好香椰汁味呢～我哋另外叫咗兩份海鮮拼盤($70一份)。蜆無沙，蠔新鮮無腥味， 仲有鮑魚，帶子，青口 ，蝦同魚都唔錯。肉類都算新鮮，唔會話解凍咗好耐黑曬色。我最鍾意羊肉片同排骨。原來排骨打邊爐竟然咁好食。蔬菜盤分量唔多，勝在每樣有啲，好彩可以再追加菜。泰式鳳爪酸酸辣辣好開胃。唔夠食仲可以追加火鍋配料。最特別係Mama麵，即係即食麵，冬陰功味。包味粉酸酸辣辣好特別，好有泰國風情。總結係，雖然任食邊爐有好多選擇，但係泰式嘅真係好特別。