皇冠冰室 (Closed)

又約朋友出嚟旺角行吓街食嘢喇，旺角食肆多，不過我哋經常遇到選擇困難症，喺我哋諗唔到食咩好嘅時候，經過呢間門面有啲似連鎖式茶餐廳，就決定喺度食午餐。餐廳比普通茶餐廳企理，客人亦好多，我哋跟職員指示坐低。我哋點咗幾款主食包，食物質素唔錯，價錢係比茶餐廳貴少少，但整體係幾好嘅 。見外面麵包檔嘅麵包新鮮飽滿，我哋叫咗幾樣試吓。蛋撻唔少得，酥皮層數夠夠鬆化，但只係微暖。經典波蘿油，皮脆內軟，不過包完全無溫度，牛油夾住五分鐘都溶唔到，仲係又硬又涷。奶黃墨西哥包，微熱，餡亦幾多。芝士焗海鮮飯，熱辣辣，醬汁Creamy，唔錯。海南雞配香茅油香飯，雞嘅份量幾多，肉質都幾滑，飯唔太油，入口有淡淡嘅香味。忌廉蝦雞肉意粉，雖然蝦同雞一齊有啲怪，不過想有肉有海鮮都係唔錯嘅選擇，而且都幾好味。蒜片牛柳粒意粉，牛柳粒幾香，唔韌，兩款意粉都幾好。滑蛋蝦球魚柳炒河，河粉幾大碟，配菜有三粒蝦球，兩件魚柳，相對少咗啲，味道可以。轉套餐涷飲加$8。