龍鳳祥餃子館 (Under Renovation)

今日係佐敦上完堂，諗住醫埋肚先返屋企，呢邊一連幾條街都好多餐廳，超級方便，揀咗一輪就決定食龍鳳祥餃子館。舖頭細細但乾淨光猛，全部用木枱木凳，牆上掛住傳統中國風裝飾嘅各款招牌菜。枱上面放咗醋、豉油同豆瓣醬，任客人自己調醬，啱曬我呢啲無醬不歡嘅人！蕃茄雞蛋淨餃（$49）好特別嘅內餡，餃子皮算薄，見到入面嘅特別紅黃蕃茄雞蛋內餡，咬落感覺少少甜又好有鮮味。唔鐘意淨嘅話可以加錢轉湯底，有秘製牛犇、惹味酸辣、閞胃蕃茄同冬陰功湯底比客人揀。肉三鮮煎餃（$60）餡料有韭菜、豬肉、蝦仁，外皮煎到金黃色好香脆，一咬落去啲汁係爆出嚟嫁！惠顧任何餃子或者麵飯+$18配小食同飲品，我哋就叫咗口水雞翼同無糖豆漿，雞翼皮爽肉嫩，口水汁唔會太辣好惹味！牛展麻醬冷麵（$54）拌冷麵份量都幾大，滷水牛展切條鋪咗係面，配料有青瓜、紅蘿蔔、青椒、紅椒、烚蛋，麵底係白幼麵，配上一大碗麻醬，撈埋一齊食，非常豐富！臨走見到呢度仲有外賣生餃同快餸小菜$42一款、$78兩款，如果住附近買返屋企加餸都幾正！