White Button Cafe & Dessert (Closed)

假日就梗係約朋友嘆返個Brunch啦，今日就揀左嚟White button，上次嚟係童話feel，今次就轉左傻豹嘅少女feel。唔理係少女定中女，都一定埋去個打卡位影吓相，隻傻豹俾人「輪」左好多次，好攰咁，好好笑，辛苦晒~~講返野食：Mocha味道一般，我覺得咖啡味唔夠濃。紅棗枸杞五寶茶朋友話要養顏喎，有紅棗、枸杞、玫瑰、桂圓、菊花，無另外加蜜糖，味道最原始，清甜。無蠟燭仔㷫住，硬係覺得爭啲啲咁。紐西蘭肉眼牛扒配意粉用鐵pan上枱，意粉軟硬度好，多蒜蓉，夠煙韌。牛扒個汁可能係雜菌汁，帶點酸味，唔係太夾。芝士牛肉漢堡芝士半溶，漢堡扒加左洋蔥，麵包又加左牛油烘底，係好食。不過薯角係凍嘅，希望注意吓。宇治抹茶梳乎厘奄列奄列超大件，好誇張，伴有忌廉同脆脆碎片。奄列好濃抹茶味，夠軟滑。除左個抹茶雪糕同忌廉甜度適中，成個甜品都好低甜，我好鍾意呀，食完冇咁大罪惡感。千層餅有宇治抹茶、玫瑰蜂蜜、黑糖珍珠同朱古力四款口味。見到隔嚟枱碟玫瑰蜂蜜pink pink咁又有啲碎花瓣，幾靚咁。但我地都係揀左朱古力味，面頭加左啲朱古力脆珠，再淋滿朱古力漿同朱古力粉，朱古力味濃，而且幼滑輕甜~期望下次再嚟，再影多啲相