Mango Tree Kitchen (形點) (Closed)

每次經過都見到有人等緊位，周日特登同朋友約早啲，點知六點半來到都要等位！好彩，等十分鐘左右就可以入座 餐廳環境新簇簇，座位尚算舒適，如果櫈下有籃可以擺袋當然更好啦，無就唯有擺喺沙發位隔離。陳設裝修都幾有東南亞色彩，唔錯唔錯兩個人唔係好肚餓，點左泰式大蝦炒金邊粉、招牌冬蔭功同青芒果軟殼蟹沙律。金邊粉OK，啲蝦好彈牙！最正係配左個辣椒魚露，灑幾滴落啲金邊粉真係寧舍醒胃。招牌冬蔭功雖然寫住兩位用，但我地兩個每人可以飲到兩三碗，主要原因係因為好足料，大頭蝦真係好大  個湯既味道好有層次，先酸後辣，而且辣味既後勁都幾凌厲，回味 三道菜之中最鍾意青芒果軟殼蟹沙律，軟殼蟹外脆內實，諗佢唔到都幾厚肉，仲有少少膏香味。而個青芒果沙律夠爽口，酸咪咪得嚟好好好辣，辣得好過癮呀！個人認為必點推介竟然係一個飲品——CHOCO CHA CHA  泰式茶加朱古力漿，哩個組合好特別，茶味濃之餘又同個朱古力漿好夾喎，上面仲有滑溜CREAM同一塊OREO，口感層次好豐富呀！我決定以後來幫襯都必定要點哩個飲品！！！最後以斑蘭千層糕作結，千層糕口感太煙UN，唔係我杯茶，所以不多作介紹喇。