甜蜜蜜甜品專門店 (Closed)

甜蜜蜜，一直都係尖沙咀區龍頭糖水舖，"心太軟" 和 "疏乎里"都係招牌甜品。但係近期响附近開左一個新的糖水舖，分散左不少客源。但係成班人難得行開去到尖少咀區，當然要去番老品牌的糖水食下。可能真係客源分散左，唔係以前有咁多人响門口等位。但係都要花少少時間去等下枱先有得入。坐低左，緊係叫番個心太軟，疏孚里，士多啤利窩夫，迷你大堆頭。全部食物都係製作需時，所以都要等左一陣先有得食。首先食下個心太軟，一樣咁好食。切開個甜品，中間溶左的朱古力流晒出來，仲要係好夠熱，食落口感好甜。跟住要快水快腳食個疏孚里呀，如果唔係個疏孚里會 "冧"左。點埋個朱古力醬，味道都係一流。士多啤利窩夫，個士多啤利醬都好甜，個窩夫都好鬆軟，感覺好好食最尾食番個迷你大堆頭，即係什果涼粉西米露。什果和涼粉都係一般，所以相比其他甜品，呢個就好似比較遜色。但係整體來講，各種招牌甜品都仲係有一貫水準，而且味道一流。難怪店內都仲有好多客人光顧。