源興茶檔 (Closed)

上環街市熟食市場係區內上班族嘅窮人飯堂，價廉物美，食得你飽，又唔使太貴，識搵食仲可以搵到啲好好味嘅嘢食。除咗出晒名嗰啲之外(我反而好少食)，仲有好多都係臥虎藏龍。啱啱先同朋友講起喺上環好難搵一間蛋治煮得好食嘅茶記，點知今日就咁岩嚟咗呢度。叫咗件蛋牛治，實在係區內食過覺得最好食嘅 (因為本來最好食嗰間蛇竇已經冇咗，變咗呢度係最好食)。首先係塊麵包，嗰種柔軟程度，如果你唔話俾我聽呢度係上環街市熟食中心，我以為自己去咗啲日式洋食店食三文治，因為嗰塊麵包嘅質感，實在就係日式方包一樣咁軟滑！炒蛋恰到好處，大概就係七成熟，配埋碎牛，超正！入口無論由麵包去到雞蛋再去到碎牛，都係差不多嘅軟滑質感，成件蛋治就融為一體，好掂！而且師傅好窩心，整件蛋治一開四，食起嚟好方便！唔係好夠皮，叫多碟意粉，見到有紅腸，二話不說就叫個煎蛋紅腸意粉，而家去茶記想搵紅腸食真係碩果僅存！煎蛋好夠火候，啱啱好起焦有燶邊索埋d豉油汁係一絕夠惹味，而中間蛋黃仍然係半生熟有蛋汁，撈落意粉度食真係童年回憶返晒黎！今次食住呢兩樣先。