上海小南國 (時代廣場) (Closed)

好耐無黎小南國，估唔到多咗咁多菜式。疫情期間，要搵間企理又坐得舒服，價錢又合理嘅真係唔易，小南國俾我感覺都唔錯，食得安心！水煮牛肉，我老公好喜歡，佢話好夠味，對我黎講就較辣！萵荀絲，萵荀好新鮮，清清地啱我口味！炸豬手，估唔到咁脆，呢個真係炸得好香脆，又唔會好乾！小籠包，必食！我一向對小籠包好有要求，呢個不錯，皮薄多汁，好味到我再叫多一籠！招牌炒飯，呢個就正常味道，有油香味但又唔會好油嘅感覺！香蕉豆沙窩餅，呢個我出面未見過，一般出面只係豆沙，呢個加咗香蕉，香蕉熱辣辣好正好香，特別要讚係個皮煎得好香脆，香蕉加豆沙好夾！我見佢哋個四人套餐好似幾抵食，不過我哋只有二人所以無叫呢個餐！當晚有九成坐滿，見啲侍應都好忙，我見隔離枱仲係咁問人解釋幾款菜式係乜嘢，但係個侍應生都好有禮貌咁介紹，呢樣都值得一讚！