The Starred

Open Now

Now Closed

依間餐廳我自己都食過兩三次，之前食下午茶冇得訂枱，兩個人都等咗半粒鐘先有位。今次一個人食夜晚book咗都係要等十分鐘，不過啲嘢食同服務都值得等待嘅。一點完餐就有包同湯，本身要紫薯忌廉湯，好似幾得意咁，但太杰身，唯有同侍應轉做番茄湯。塊餐包好抵讚，侍應見我食完問要唔要加包，仲推薦用嗰樽油醋，係幾有心思嘅。到嗰main course，啲配菜有蒜香，甜得嚟又唔膩，塊豬我都怕會煮太熟或者有騷味，侍應落單時有提鐵板會易韌同大油煙啲，所以我揀木碟上，依個價錢好抵食，嗰汁好惹味唔鹹。不過連埋薯仔係份量太大，侍應問我要唔要打包拎走，冇諗過西餐都可以打包費事晒嘢我都拎走咗。餐飲有幾個好特別，之前飲過朱古力，濃到要加糖先得，今次飲橙茶，侍應話會甜過檸檬茶，怕澀可以試吓，但我覺得係嗰茶底太濃，都係問佢拎糖先總括要等位同叫完嘢飲都要等一段時間，但餐廳裝修唔錯，聽住啲舊英文歌都幾relax嘅。嘢食真係值得等一等，餐廳啲侍應都幾後生，怕醜啲但有禮貌，就算多要求都會做，臨走又會話小心門口梯級唔會話俾完錢就唔理你。