Cocolo Tokyo Cake Factory (朗豪坊) (Closed)

之前喺灣仔試過Cocolo嘅青森蘋果批，一直都念念不忘，難得喺旺角開咗分店，今日路經附近，呢期又咁興食apple pie，就買幾個返屋企。原來依家已經發展到有配送服務，做散水餅都唔錯喎！其實呢度除咗有青森蘋果批做主打之外，仲有好多唔同種類嘅甜品，不過今日嚟到已經比較晏，好多都已經售罄。雪櫃內仍有唔同款式嘅蛋糕。連Macarons都有，真係幾吸引。買咗幾件蘋果批返屋企，連包裝盒都一樣咁精美。每件青森蘋果批都會有一張紙包住，方便進食。青森蘋果批係一個千層酥，入面包含着青森蘋果醬，仲有粒粒蘋果肉，非常有咬口，甜度亦適中。老公鍾意食cheesecake，所以我仲買咗一件香橙鮮芝士蛋糕。芝士蛋糕好香滑，充滿芝士香味之餘又唔會覺得太溜，配合微微嘅橙香非常清新。