PokéToké

Open Now

Now Closed

暴飲暴食完一輪係時候要（扮）減吓肥啦，呢件Poke Bowl開喺旺角，有招牌同自選Menu，選擇多元化，仲有多款熱食，炸物同飲品供應。食物色彩繽紛之餘，食落健康又飽肚，絕對係唔少Keep Fit人士醫肚嘅好選擇～經典雞肉包含慢煮雞肉、蟹柳、玉子絲、豆腐、凱撒沙律醬、紫菜絲、木魚絲同黑白芝麻。蓋飯底可以自選跟壽司飯、沙律菜、二合一或冷麵。雞肉嫩滑唔嚡口，蟹柳同玉子絲帶淡淡香氣，豆腐可補充蛋白質，滿足感UP。熱食要咗咖喱牛丼飯，呢款反而有驚喜，咖喱偏甜唔辣，醬汁足以撈飯，牛肉大塊薄身，仲有粒粒薯仔增添口感，若可以加飯就好啦🤣 炸物有魷魚圈，炸至金黃酥脆，唔算好油膩、而飲品係士多啤梨奶昔，甜度適中，飲落開胃。