盛記酒家

Open Now

Now Closed

今晚繼續食中菜，灣仔我唔太熟，但朋友就介紹左呢間酒樓， 話佢啲燒鵝幾好食，咁就嚟試下啦。上到嚟都幾多人，感覺好熱鬧好港式，因為太多人，我就唔影環境啦，因為只會見到好多人。睇佢個餐牌都幾多小菜揀。而我朋友介紹咗燒鵝，所以我都目標明確地嗌咗個例牌先。其次我自己就好鍾意食龍躉肉，因為除咗啖啖肉之外，佢層皮煙煙韌韌都好好食。所以就嗌咗個一餸兩味。因為我想食佢隻燒鵝髀，所以就貴小小揀左個下庄。佢隻燒鵝都幾肥下，所以少出嚟真係好香好邪惡，佢個外皮又係燒到又香又脆，而個髀位更加係又滑又腍。龍躉第一味係翡翠炒班球，龍躉切到大大片，啖啖肉，夠鑊氣，啲西蘭花都吸晒味。第二味係金銀蒜蒸頭腩，佢個腩位簡直係滑到不得了，個魚雲都好大舊，食魚食到膩都係第一次。食飽飽，當然唔少得糖水，今晚係紫米露，唔會太甜，岩晒我，但如果可以加埋西米露就冇得頂啦。