CIAK - All Day Italian (太古城中心) (Closed)

平時同屋企人出去食多數都係食中菜，今日少人啲，輪到我話事，咁我提議食西餐。 我想食CIAK嘅餐廳好耐㗎喇， 同佢同集團嘅中環店係高檔餐廳，暫時未有幸幫襯，今次食呢間係主打意大利菜嘅，價錢親民，仲係米芝蓮餐廳嚟㗎。去到都好多位，餐廳唔算滿。 我哋叫咗一個 蛋黃芝士醬卡邦尼意粉，同埋 水牛芝士羅勒蕃茄醬 pizza。嘢食未嚟到之前有麵包， 味道都唔錯。等咗一陣嘢食嚟到喇。 哇， 個卡邦尼意粉超級多蛋黃醬，成碟係黃色㗎! 　　一望就覺得好吸引! 可能我鍾意食蛋黃醬喇，所以對呢個做法嘅卡邦尼意粉非常有興趣， 一食落口每一條意粉都掛滿咗好好味嘅蛋黃芝士醬汁，意粉亦都煮到啱啱好，好彈牙好有咬感，真係超級超級好食! 另外個pizza都好正，佢唔太厚又唔係好薄嗰種，食落去覺得個餅底烤到啱啱好，有少少煙韌又有啲鬆軟， 再加埋水牛芝士同蕃茄，每一件都非常之好味! 正到我地一人可以一次過食三件都得! 成餐好滿意，啲嘢食實在太好食，我哋慢慢品嚐, 有啲唔捨得食曬佢哋! 價錢又唔算好貴, 環境都唔錯, 嘢食又咁好食, 我真係好推介! 如果有分店就好, 因為都啱朋友聚會，但約大班人通常未必會入嚟呢區食。