老闆火鍋冰室

Open Now

Now Closed

🐻爸就算天氣熱辣辣都有股邊爐癮，等佢收工返到元朗，🐻媽我就揾定餐廳等佢開餐。今日我哋胃口特別好，揀左老闆火鍋冰室，佢哋7月先開始火鍋放題，今晚一於食餐勁。去到老闆火鍋冰室望下餐牌有兩個套餐可以揀，分別係$238任食美國Prime Grade牛肩胛同$298任食美國安格斯牛頸脊，價錢仲全包免加一，可以兩小時任食。我哋揀左安格斯任食，湯底點左胡椒豬肚雞煲，可以無限追加雞件，真係唔怕食唔飽。湯底來到同時仲有贈送既海鮮拼盤，有鮮蝦，元貝，貴妃蚌，日本蠔同脆肉鯇五種海鮮，一邊食雞同海鮮既同時，一邊追加牛肉，仲見到豬粉腸，豬潤等多款內臟，自然唔會放過。牛肩胛同牛頸脊都好重肉味，我哋食完一碟又一碟，豬生腸豬潤都好鮮唔腥，值得一讚。唔覺唔覺就食左兩個鐘，我哋都飽到上心口，捧住個肚滿足咁返歸。