永順食店 (Closed)

每個人呢度大部分一定係食佢嘅沙嗲牛蟹黃麵、又或者係炸豬扒蟹黃麵。但係我次次黎都係食佢個先有蛋治再加杯熱奶茶，我覺得呢個配搭先係最好食嘅。老實講佢個公仔麵比一般茶餐廳係好食嘅，但係我覺得就冇乜驚喜、但係佢個鮮牛蛋治係非常之嫩滑，我覺得係好食過佢個麵，不過各有各喜好啦。想講吓佢個熱奶茶係我咁多年來都會返嚟飲嘅，茶味好夠好香好濃，啲奶又夠滑，不過最緊要係個溫度控制得好好，每次上枱都係超級熱，雖然我知道飲太熱嘅嘢對健康唔好，但奶茶真係要趁熱飲⋯⋯環境方面，嚟得呢度就預咗係要坐得逼啲，仲要搭枱，真係預你食完即刻起身走，冇辦法啦人哋係小店，翻桌率非常重要，所以我哋都好識做，食完就即刻起身走啦，是日係閒日，出面都要排隊，所以星期六日就唔好去啦。