拉麵來 (Moved) New Location

行開旺角就知拉麵鋪都有唔少，聽朋友講話拉麵來幾好食就同朋友黎試下，殊不知又真係幾好食。今日同朋友叫左一碗北海道花咲蟹蟹味噌雞白湯拉麵，原味豚骨拉麵同埋自家製餃子。飲品就叫左綠茶可樂同埋蘋果梳打。北海道花咲蟹蟹味噌雞白湯拉麵有驚喜，麵有幾件好多肉既蟹，肉質偏實，唔會散哂一pat咁。食落仲有蟹味，正。麵仲有一隻開邊既溏心蛋同巨多既筍，如果唔食筍既你就記得同店員講左先啦。之後豚骨拉麵湯底濃郁，個人黎講比較中意呢個。豚肉肥瘦均勻，食落仲有少少油香。不過呢碗本身無跟溏心蛋，如果想食就要同店員講額外加啦。跟住講下餃子，餃子配埋個醬汁酸酸地幾開胃，入面係好多豬肉，唔係偷工減料落菜就算個類餃子。綠茶汽水未試過既話值得一試，第一次飲完之後係咁心掛掛想飲多次，綠茶配埋可樂原來咁夾。另外蘋果梳打就無乜標青既地方，同平時大家飲開既都差唔多，呢款會偏多氣少少。