六小館

送完朋友機之後返左東涌食晚飯，順便行下outlet。行到六樓見到一間叫六小館既餐廳，見到門口餐牌既二人套餐，價錢唔駛$300，所以入左去先。餐廳屬於半開放式，我地坐係藍磚胸牆旁邊，環境非常開揚。裝潢方面，時尚懷舊兼備。由於女友太想食鹽焗雞嘅關係，我地放棄二人套餐，改為散叫。古法鹽焗雞叫咗半隻，味道唔會死鹹，肉質幾嫩滑，唔算啖啖肉但唔會好多骨。另外用鹽焗雞既雞油作拌飯一流。野菌豆腐煲顧名思義有野菌同豆腐，其實仲有其他材料，豆腐野菌非常入味，略嫌份量比較細。蟹粉小籠包有我拳頭咁大，但外皮出奇地薄，充滿彈性但不會輕易破掉。邪惡的蟹黃油流曬出嚟，入面餡料啖啖都有蟹黃，非常鮮甜。灌湯餃入面包括大量豬肉餡，原粒瑤柱，鮮蝦等等，包薄不在話下，上湯同餃比例係1:1，上湯非常清甜，加唔加紅醋就悉隨尊便。以後大家行完outlet可以試下六小館，相信一定更加滿載而歸。