日嚐

Open Now

Now Closed

一早bookmark咗呢間餐廳，滿心期待去到，去到發現環境都幾窄，要側身攝下攝下先入到位坐低。店員態度感覺唔太友善，畀qr code落單時係掉落張枱。叫咗個慢煮和牛牛小排定食（$168），點知嚟到係一堆肥膏、色水唔靚、肉味欠奉、肉質難齒開，完全同「慢煮」、「和牛」等字眼唔掛勾。都唔好講前菜嘅日式大根得一片蘿蔔，麵豉湯淡而無味、得兩塊昆布，完全畀人感覺係冇心做好食物，非常失望。最尾食完晒，店員都收晒碗碟，帶住嬲嬲地嘅心情，起身行埋去店員隔籬諗住埋單，佢好似唔知發生咩事咁，要開到聲講埋單佢先有反應同意識。簡單嚟講，食物質素差，極貴夾唔好食，店員態度有待改善。鐵定唔會再食。