霸嗎拉麵 (Moved) New Location

又黎朝聖啦，今次帶埋個朋友仔一齊黎食，有好野梗係要架啦。望下格離台，叫左個炙燒豚肉味玉拉麵，未諗到食乜好，一於跟風先。豚⻣湯底夠杰身，係我鐘意既口味，但又唔會成口味精既感覺。一個好既湯底，絕對係成個拉麵既靈魂。所以基本上飲啖湯，你就會知道呢間舖頭既質素。。。另外叉燒好肥美呀，又夠哂厚，再加上少少焦，食落好香口。味玉夠流心，而且蛋味好出，味道堅正。燒餃子係我去拉麵店既必點之物，因為佢總係可以燒到有層脆皮脆卜卜，而且餡料份量都多，唔會得層皮。係屋企自己嘗試過整幾次，但都係失敗，睇黎我都係出去食好過。唉。靜岡蜜瓜梳打係再次ENCORE架～因為平時係出面好少見有得飲，黎左兩次都叫呢個，味道唔錯，蜜瓜味唔會太假，值得一試。最後最後，再叫左個綠茶雪糕，兩份食，食完個拉麵可以清爽下～正～今次食完朋友仔都大讚無介紹錯，聽人講炸雞都唔錯，下次一定要再食。