陳儀興玫瑰餐廳

Open Now

Now Closed

上星期凍左幾日，同朋友去左新蒲崗玫瑰食羊腩煲，環境有點古舊但夠光猛衛生，職員都好友善，而我見到隔離枱十個人個雞煲好似成座山咁真係好吸引，下次要約一大班人去！枝竹羊腩煲 $398好足料既羊腩煲，羊腩夠腍夠嫰，羊味唔會太羶，其他配料有枝竹，馬蹄，筍，冬菇等等，好香濃。因為兩個人食得慢，食食下有啲痴底，店員主動過黎幫我換煲，真係非常好。食完之後加清湯打邊爐，叫左一份雙拼餃（彈牙魚皮餃，獨門芥末西芹餃)$58，雙拼丸（粒粒章魚丸，香菇貢丸） $62 以及一份手打薯粉 $18。餃夠大隻，連我平時唔食西芹都覺得個餃好食，不過就食唔到芥末味。兩隻丸都彈牙，特別鍾意個章魚丸，好有口感。最正係薯粉，好掛汁，好濃羊腩汁味，好好食！除左汽水啤酒，茶餐廳飲品，餐牌仲有健康飲品，叫左金銀花茶同羅漢果茶 $20，見到係陳儀興出品，我枝金銀花茶都幾好飲，少少甘。