蛇王兄 (Moved) New Location

近幾日天氣急降，一下子跌到十四度，又係時間出去食蛇進補。我食開既當然係觀塘既蛇王兄，裕民坊重建成條街既鋪都執哂，佢地搬左去宜安街再起風雲。路經宜安街，原來蛇鋪都有三四檔，好不容易找到蛇王兄，就在小巴站旁﹗鋪仔細細，約有五六張枱左右，除了蛇羹外，而家仲賣埋小菜添。小菜無興趣，點了個B餐，中蛇羹加糯米飯及蛇湯，$48。蛇羹依舊足料大碗，一個中湯碗滿滿的，啖啖蛇肉，還有雞絲、木耳、冬菇絲等。唔係講笑，食兩啖真係胃部有股暖流向上湧，不脫下外套必會成身大汗，蛇羹確係補暖禦寒名物。糯米飯煙韌，花生及蔥花下得多，夠香口，正﹗蛇湯原來係無限添飲的，飲完一唔夠喉可以再來，但小心補得太緊要吧﹗加$10有生菜，一個餐其實極豐富，食家直頭食唔哂添。秋冬進補來幾十年老字牌既蛇王兄，準沒失望。