茶記冰室 (Closed)

平時無無聊聊諗唔到食咩好，茶記就最啱喇！今日係石蔭做野，放工見到哩間茶記冰室，又茶記又冰室，好奇之下入咗去試試佢！我同同事兩個人放工肚餓死，叫咗勁多野食！我地要咗西蘭花炒花枝片，冰鎮咕嚕肉，豉椒炒蜆同埋沙薑雞腳，加配兩個飯兩個湯，勁足料！仲有凍檸茶！先講下西蘭花炒花枝片，西蘭花好爽口，唔會太淋，仲要索曬啲汁！同埋花枝片勁爽口滑身，好好咬。豉椒炒蜆係好有鍋氣！香到隔離枱都有話要嗌翻碟😂仲要勁多蜆，絕對無偷工減料！仲有沙薑雞腳，雖然係小食但係份量都好多，好入味。重點推介冰鎮咕嚕肉！咕嚕肉上面鋪滿好多冰，賣相好有特色，咕嚕肉咬落好爽，炸得好香脆！仲有菠蘿同埋番茄仔做伴碟，食得太多肉食返啲蔬果，感覺好清新。果然係招牌菜！大家經過一定要試吓！除咗啲嘢食好食，其實呢度嘅裝修都好有特色。牆上面掛住一啲香港特色嘅牌，好有舊式茶餐廳同冰室嘅風味。去開石蔭嘅朋友不妨入去試一試。