台蔡滷肉飯

Open Now

Now Closed

平時真係好少有機會入嚟荃灣，難得今次有野做順便諗住喺附近食埋飯先，發覺到原來原先beans嗰個位置已經開左新餐廳，仲係食台灣野，當然要試下。店內位置唔算好多，但勝在樓底高，採光度亦唔錯，令人覺得環境都幾舒適。餐牌主要都係以飯類為主，見有唔同滷肉飯嘅配搭，不過想食麵嘅話就相對少選擇。今次試左個鹽酥雞滷肉飯套餐($70)。一嚟到見到依到個分量都有啲嚇親，估唔到會有咁多塊鹽酥雞。個set包左一碗滷肉飯同精選小菜，今次嘅小菜係豆干。小菜食落正常發揮，無咩太大記憶點，不過鹽酥雞就真係好好食，首先分量超多，起碼有10幾粒，炸粉同雞肉調味都唔錯，肉質嫩滑，唔會好乾身，加上九層塔味道頗突出。分量多到我一個人幾乎食唔哂，覺得完全係兩人分量。滷肉飯係用左半肥瘦豬肉，而且加入左酸菜，令人感覺上無咁油膩。飯嘅分量亦頗大碗，但自己略嫌味道唔太足夠，無咩嗰種鹹甜鹹甜嘅味，至少唔係我心目中嘅味道。所以個人覺得滷肉飯對我嚟講好麻麻，鹽酥雞反而就好出色。以依個價錢嚟講，因為分量頗多覺得都算係幾抵食。