奈良上釜 (Closed)

自哩間釜飯喺銅鑼灣開張後一直出現人龍，喺各個社交媒體都睇到好多好評，今晚終於黎到試下，亦係我第一次食釜飯。等左5分鐘左右就安排入座，坐低後就睇下食咩好先！但其實黎之前我已經諗好左喇，一心揀定要食蟹盛，因為實在太中意食蟹喇！蟹盛係一個套餐，$298包幾款食物，好豐富。第一道上松葉蟹腳，哩個係冷食，蟹肉鮮味，點住柚子醋食好開胃，岩晒夏天食呀！再黎既係另一道熱食前菜 - 蟹腳天婦羅，炸到金黃色好香口，炸粉薄食到原條蟹腳肉好味道！最後到主角出場喇！用一個特製既鍋裝住熱辣辣既飯同蟹肉，鋪滿晒既蟹肉好鮮甜，加埋蟹膏食更濃味。食到底仲有飯焦食好正！仲有個蟹肉蒸蛋、味噌湯同生果，哩個餐好多野食！而我朋友就叫左七盛釜飯，食飯前先食幾道小菜。跟餐仲會有碟刺身，魚同蝦都好新鮮呀。七盛釜飯以海鮮為主，有原隻新鮮鮑魚同海蝦岩晒中意食海鮮既朋友。哩間餐廳既釜飯用料新鮮，而且香港又冇同類餐廳，難怪見到門口長期出現人龍啦。