牛県

Open Now

Now Closed

餐廳四四方方，可以坐三十多人，七點去到已坐滿大半。餐廳好貼心，服務相當好，見到我一袋二袋就主動幫我收起又比籃仔放袋，見食完又會即刻比濕紙巾，仲有提供消毒酒精搓手液同熊寶寶噴衫去味。初次食石燒覺得好正，石燒可以自己慢慢去控制肉嘅熟度，覺得夠熟就拎起慢慢食。呢到食物質素好高，牛肉味道好濃，而套餐湯沙律飯都係足料，今次二人叫左兩份套餐，每人平均$170 。味噌蜆湯比一般飲開嘅濃好多，但味道唔咸，配上蜆關係仲多左鮮味。田園沙律配柚子汁酸酸甜甜好開胃，夠哂新鮮清新。薯條 & 飯薯條外脆內實，好有質素。飯仲會有飯素配上，增加咸香味。上腰西冷 (200g) $118比起一般餐廳食西冷扒更厚身，食落牛香味好重。牛側腹扒 (200g) $128 因為油脂較多，比起西冷，個香味更強，真係 齒頰留香。肉質口感兩者相差不大，都係有咬口唔韌。有兩款醬汁配上，兩者比自己較鍾意青醬，味道較清新特別，少左啲油膩感。