福岡漢堡扒 (厚福街) (Closed)

去尖沙咀揾食一定會去厚福街，選擇又多又高質，今次就去咗人氣韓國石燒餐廳 — 福岡漢堡扒！每個位都有吸氣管，喺燒肉嘅時候將吸氣同石頭位置對準，吸氣位吸油煙力幾強，食完頭髮、衣物都唔會有太大浸燒肉味。落單可以自己scan QR code，我哋今次就叫咗個2人餐（$355），包兩款漢堡扒、一款飯、湯、沙律同飲品。芝士蛋蒜和牛漢堡扒，漢堡扒會整到係一個圓滾滾嘅波，造型得意，鐵板上面仲有拉絲芝士蛋。燒肉時，先用鏟以垂直方式切出適量嘅肉，再加湯匙輔助放上石板，稍微壓平，每面大概煎三秒，想食焦香啲，可以燒多五、六秒。芝士漢堡扒加上燒香蒜片，邪惡又好味！墨西哥辣椒和牛漢堡，鋪滿墨西哥辣椒粒，燒肉扒時記得拌入，呢款漢堡扒入口富肉香仲有椒香，口感更濕潤，刺激惹味，愛辣人士必試！和牛乒乒乓拌飯，齋食漢堡扒可以會太膩，配個飯就最好！香濃和牛肉、太陽蛋及沙律菜加特製韓式辣醬拌勻，口感豐富！巨峰提子特飲、西柚特飲（+$18）特飲杯好得意，容量超大，前者富提子香氣，檸檬片增加香氣同層次，後者酸甜兩種味道都幾濃，整體味道唔錯。