Mark One (Moved) New Location

歌賦街一向出名多食，由街頭食到街尾都要花上一段日子，今次終於試到街尾依間餐廳。其實大早前我已經想試依間鋪，但次次去到見到佢大排長龍就已經望而卻步，上次佢經理留張卡片俾我，於是今次趁朋友生日要請食飯，我就特登訂定。本來我一直以為佢唔夠位係因為鋪頭細，但原來佢裡面係別有洞天，除地面外仲有閣樓成層。第一樣值得讚係佢訂係真係有留俾顧客，唔會要人再等位，以佢咁好生意講肯堅持依樣都算難得。午市餐牌食亦都好吸引，不但止款式多，而且普遍價錢唔貴。今次朋友叫煎鱸魚，而我就揀天使麵，前者肉質口感不俗，而且火喉控制得當，後者個汁亦都做得唔錯。餐湯係火腿忌廉湯，綿得真係有火腿味，唔係一般罐頭同急凍貨色。而餐後仲有喱同餐飲附送，埋單幾十蚊唔收加一真係幾抵。臨走服務亦值得加分，由樓上下來到出門口，從經理到廚房傳菜都會講多謝同再見，店員訓練度可以話比得上大酒店。