八幡屋涮涮鍋

Open Now

Now Closed

超級肉食獸嘅我哋又係時候要打邊燼盡情咁放肆。任食火鍋店係我哋最愛之一，而且見食評好多推薦再加埋做緊優惠，C3餐可以買一送一之外D4餐都有全天候半價，當然襯住有優惠去試下最豪華果set﹗D4日本黑毛和牛除咗肉類之外，就連刺身同埋海鮮都可以任食，種類超級多，而湯底都有好多種，今次揀咗壽喜燒湯，可以拎生蛋點牛肉。座位好闊落，就算叫好多都唔洗驚唔夠位放，坐得夠舒服又夠私隱度，唔會咁易睇到隔離位食緊咩。裝修都好靚，有好多達摩公仔好得意。海鮮拼盤有超多種類可以揀，海蝦、帆立貝‵蜆、螺，而且仲有D4餐先有得叫嘅鮑魚。自助任食區都有勁多選擇，全部都已經一兜兜咁裝好，夠晒乾淨衛生。除咗丸類同菜蔬，仲有響玲同炸魚皮，依兩樣都係打邊爐最愛。當然熟食都有唔少，有天婦羅有炸物，都好好食。飲品都夠晒多款揀。揀依個餐，當然肉類係重點。肉類用返手機落單，落完單之後都好快送到。首先叫咗日本黑毛和牛A4同埋A4和牛三角肉。賣相已經好靚，粉嫩嘅肉片佈滿雪花，見到都流晒口水。三角肉有好香嘅油脂，脂肪同肉嘅比例都完美。另一種油脂少啲肉味就多啲，加埋蛋汁仲正。