大麥牛肉麵 (Closed)

雖然小店嘅野食選擇唔多,但毎款都相當吸引呢。今日去食晚餐,滷味雞脾飯已經賣哂,睇佢餐牌嘅相真係食指大動,唯有下次早啲黎食啦。另外,餐牌嘅相都顯示左小食嘅份量,明買明賣,唔會話上菜後先覺得太多或者太少。小食叫左紅燒蘿蔔同皮蛋豆腐。蘿蔔煮得好上色,入味,好淋,無渣。皮蛋豆腐個重點係個汁到,係有微微嘅醋味,勁開胃,本身我唔係好接受到醋嘅好重酸味,但依個係好淡淡的醋酸汁,對我來講幾有驚喜,覺得個汁有得沾冷麵食嘅話都會唔錯呢。主食有滷肉便當，飲食均衡,仲有蛋同青菜呢。滷肉唔會太肥,切得比較大粒,有啲咬口,仲有啲菇粒,幾香菇味,撈飯食真係唔錯,啲滷肉汁嘅份量都岩岩好,唔會太多令個飯太濕,又唔會太少汁最後齋食飯咁。仲有叫左紅燒牛肉麵。麵條厚身,幾有咬口,湯頭有啲莞茜同蔥香,都唔會太咸,就咁飲都幾好飲舒服,牛肉比較薄切,咬幾啖就有啲牛肉味。飲品點左桂花薄荷酸梅湯。聞到同飲到桂花香味,薄荷味都幾清新,酸梅湯個味就無平時個啲咁酸,飲到底仲見到有洛神花呢。食完野,出到門口睇一睇,原來星期一佢promotion勁平,最高有6折,下次真係叫多啲人一齊去食,食得多啲野又多啲折。