札幌元祖北海道拉麵 (Moved) New Location

晚上在 IFC 睇《得閒炒飯》八點場，女友卻因要開解朋友而遲到，本來預留了一個鐘吃晚餐，最後卻得番四十分鐘，唯有立即走入附近的札幌元祖北海道拉麵店。差不多七點半，仍然未需排隊等位，內堂的座位排得頗密，是簡單的日式飯堂佈局。餐牌不是獨沽一味拉麵的，還有多款定食選擇，就連鰻魚飯也有供應，但始終是第一次來，當然要試試這裡馳名的拉麵。我們分別要了味噌拉麵及豬骨湯拉麵，$65 一碗，價錢比預期的便宜。不用多久，拉麵已先後送上，奶黃色的豬骨湯頭濃而不俗，內裡浸著不少配料，包括海帶、筍條、粟米、蔥及芽菜等，其中粟米帶起一份清甜，而筍條亦煮得淋軟，至於叉燒則偏瘦偏薄，但肉質半點不韌，水準還算不錯。這裡用的是幼身微曲的西山拉麵，軟硬度掌握得很好，質感爽口之餘，也有點彈牙，將麵條連湯底一啜入口，實在吸引，同日見到 Citysuper 正在做西山拉麵的 promotion，更找來日籍師傅即場煮麵，我試了一小口，麵質也是很不錯的，下次見到要入貨了 。拉麵份量十足，一碗已令人飽至捧腹，加上時間趕急，沒有再試女友的味噌拉麵。吃罷埋單已經七點搭十一，時間剛剛好，夠鐘入場睇 Vivian 喇！