甘饕 (Closed)

昨日到銅鑼灣買嘢，途經鏞記後人嘅燒鵝專門店 "甘饕"，係門外廚窗見到掛滿唔同燒味，十分誘人！餐牌裡都有幾多選擇，包括招牌燒鵝/燒味、滷水、特式撈麵、煲仔菜、小食，以及二人/四人套餐，款式唔錯。甘饕燒鵝燒鵝以秘方炮製而成，外皮香脆，入口鬆化，肥瘦均勻，外脆內嫩，皮下油脂豐富，帶有煙燻味道，所以食起嚟又香又脆又多汁，用來送白飯或者爽滑瀨粉都咁夾。大少叉燒煎蛋飯  依度啲叉燒好獨特，用三個部位來製作靚叉燒，叉燒分3大類 : 第1款係大少叉燒(用梅頭豬肉)、第2款係肥燶叉燒(用五花腩肉、第3款就係蜜汁叉燒(用瘦豬肉)。依碟係大少叉燒，第一次見咁厚切嘅叉燒，梅頭肉軟腍有咬口，肉質鮮嫩細膩，煎蛋脆口，淋上洋蔥醬汁，口感豐富，推介！配埋個白灼時菜，簡簡單單碟蠔油菜心，解膩一流  ;  而老火湯係每日唔同款，好有住家湯嘅味道，當日係合掌瓜蘋果煲豬展，非常清甜，健脾解燥，滋潤美味。配埋凍同熱檸茶，茶底香濃解膩。