大圍小食

Open Now

Now Closed

大圍人氣小食店，次次經過都大排長龍，有多款特色香港小食供應，另有主食提供。煎釀三寶有成10幾款，新鮮熱辣辣，好有光澤，茄子、尖椒、紅腸、西蘭花、青椒、大大件，啖啖肉，性價比高，難怪咁多人食。臭豆腐$20一件，未到好臭，外皮炸至金黃酥脆，內裏帶咬口，點埋甜醬食都幾好味。魚蛋/燒賣$15有10粒，食得辣嘅一定要加辣醬，魚蛋細細粒，有魚味，感覺真材實料，燒烤QQ哋，唔粉，食完都幾飽肚。滷水/炸雞髀$35/隻，從來未見過有咁大隻嘅炸雞髀，超級脆，而且外皮都算薄身，肉質嫩滑多汁、健康啲嘅可以要滷水，細隻少少但好入味。生菜魚肉細份都有廿幾條，軟硬度啱啱好，鮮甜美味。碗仔翅好足料，每一啖都係配料，濃稠度適中，飲完暖笠笠。紫菜魚皮餃有驚喜，紫菜鹹鹹地，魚皮餃大粒，餡料飽滿。主食要咗油渣麵，油渣冇油益味，索晒啲湯汁，好肥好好味。車仔麵可以自己揀配料，最鍾意係芝士腸，細細條但竟然會爆餡，兩款嘅麵條軟硬度適中，滿意度十足，會回訪。