Mellow Brown Coffee by UCC (Closed)

第一眼見到呢件熱香餅，明顯屬於率性的藝術創作。一個變咗形的圓形，唔係用個模圈住啲粉漿煮出嚟，同埋唔知點解，餅上面會有件檸檬，顛覆晒對熱香餅的印象。殊不知，呢啲先係佢的亮點。餐牌寫住，呢碟叫做雲呢拿雪糕窩夫熱香餅。見到實物後就覺得，不如刪除窩夫呢兩個字會更加直接。重點在味道，個餅冇苦味，夠厚身，夠熱，軟熟，加埋雪糕的甜同凍，入口非常討好。加啲檸檬汁一齊食，同個甜味竟然好夾噃，清香之餘令你食得開胃。熱香餅好易飽肚，好彩有檸檬汁先食得晒。一定會再返嚟食！今日食得好之餘，亦遇上幾位服務非常周到店員，佢地令呢個茶餐的 CP 值倍增。不過咁，美中不足係呢個茶餐的跟餐 Cappuccino。咖啡的味道冇問題，反而係個拉花可以改善，好奇想知個圖案係咪公司規定的？