一家

Open Now

Now Closed

自從搬咗過嚟東區，《一家》係其中一間我常食嘅中菜館，覺得佢算係區內性價比較高嘅中式餐廳，而且佢仲有特式茶飲，款式多，有時經過都會就咁買嚟飲。呢日同朋友嚟食lunch，有午市客飯套餐，$65包前菜例湯及白飯，+$5仲可以轉菜飯。✨例湯青紅蘿蔔粟米豬骨湯，湯底香濃，唔鹹，好有住家的味道。✨韭黃蝦仁炒蛋客飯餐 $70韭黃、蝦仁、蛋呢個組合一定冇錯，而且永遠食唔厭。呢碟蛋炒得好靚，顏色金黃，而且炒得乾身唔油膩，蛋香十足，配埋韮黃更添香氣，更加好味，蝦仁爽口彈牙，份量仲好多！✨紅燒獅子頭客飯餐 $65我鍾意呢度嘅獅子頭，好啱我口味，醬汁唔會過份濃味得嚟又帶少少甜。獅子頭圓轆轆，肉質鬆化，而且好入味，索滿汁料嘅精華，娃娃菜腍身冇渣。✨小籠包(4件) $50 小籠包皮薄，內裡充滿肉汁，味道鮮甜，一啖一個，好滋味！✨櫻花蝦麻醬秋葵 $68秋葵腍身又爽口，配埋甜甜地嘅麻醬同帶有少少鹹鮮嘅櫻花蝦，係個好開胃嘅冷盤。✨扭擰妹頭 $36呢度嘅茶飲名稱都好特別，扭擰妹頭係柑桔伯爵茶、雜莓、檸蜜爆珠；茶味香濃，甜度適中，酸酸甜甜好fresh!!✨甜美二妹 $36朋友嘅橙柚子蜜糖伯爵茶、迷迭香；香氣撲鼻，啖啖清新。