Video
Read full review
2023-04-16
96 views
兩三年前想搵間午市火鍋都難，港九新界一隻手數得晒。但而家一街都係，出轉旺角隨時十間八間，逐間試都有排試。呢個現象反映兩個可能：1. 香港人真係好鐘意打邊爐，晚市都唔夠，仲要打埋晏晝。2. 生意難做，晚市冇生意連午市都照殺。今日見到社交媒體廣告，呢間叫花椒子做緊午市120分鐘任食火鍋，特價$148，仲要免加一。擇日不如撞日，就去試試佢。1:15 去到門口，問阿姐係咪有$148呢個餐，佢竟然唔知，話要問經理。經理出嚟話原來要去唔知邊個網頁度買飛然後隔日再去先係$148，正常就$158。爭十蚊啫吓話，我都懶得搞，㩒嚟㩒去都蚊瞓，一陣㩒錯掣仲麻煩，貴十蚊就貴十蚊啦，我秒秒鐘幾十萬上落都唔爭在，最緊要唔好煩到阿叔。餐廳喺地牢，落到去見到啲裝修都幾新潮，好重霓虹光管元素，充滿 cyberpunk 味道。門口對住係一個小型 music stage，更加令佢似酒吧多過似火鍋店。係咪大時大節會有 live band？係嘅話一路飲住酒一路聽歌都唔錯。而家晏晝流流當然冇 live music，不過喇叭都大大力播緊歐西流行曲，仿酸枝枱凳中國風唐餐館播鬼佬rock，呢重反差大異其趣。望勻全場，只有一枱兩個客喺度
今日見到社交媒體廣告，呢間叫花椒子做緊午市120分鐘任食火鍋，特價$148，仲要免加一。擇日不如撞日，就去試試佢。
1:15 去到門口，問阿姐係咪有$148呢個餐，佢竟然唔知，話要問經理。經理出嚟話原來要去唔知邊個網頁度買飛然後隔日再去先係$148，正常就$158。爭十蚊啫吓話，我都懶得搞，㩒嚟㩒去都蚊瞓，一陣㩒錯掣仲麻煩，貴十蚊就貴十蚊啦，我秒秒鐘幾十萬上落都唔爭在，最緊要唔好煩到阿叔。
餐廳喺地牢，落到去見到啲裝修都幾新潮，好重霓虹光管元素，充滿 cyberpunk 味道。門口對住係一個小型 music stage，更加令佢似酒吧多過似火鍋店。係咪大時大節會有 live band？係嘅話一路飲住酒一路聽歌都唔錯。而家晏晝流流當然冇 live music，不過喇叭都大大力播緊歐西流行曲，仿酸枝枱凳中國風唐餐館播鬼佬rock，呢重反差大異其趣。
望勻全場，只有一枱兩個客喺度食緊，食到一半再有一個單客，加埋我成個午市做四個客，出糧都唔夠。午市高峰時間都如此慘淡，真陰功。
侍應安排我坐低，我叫咗呢個$158套餐，包基本豬牛羊，湯底要藥膳雞煲，好彩冇乜藥材味。
個場冷清係冷清咗啲，不過人少少作為食客都有好處，起碼侍應都attentive 啲，出餐收碟加湯都照顧周到，以香港現今嘅服務水平嚟講算係好高分。
佢冇設自助區（醬料除外），所有食物飲品都係剔紙仔。
一個人唔食得太多，只係叫咗以下呢啲：
肥牛：肥瘦適中有肉味
豬肉：比較鞋，冇乜味
羊肉：偏瘦，少許羊味
雲吞：大粒皮薄，似新鮮包起
炸魚皮：全部完整大大塊，冇碎濕濕，夠香脆
午餐肉：厚切靚火腿午餐肉，口感一流
牛骨髓：正常，不過不失
娃娃菜：少少黃，但都唔老
啲料都新鮮而且有質素，百零蚊算幾好。唯一缺點係佢碟頭都幾大，應該係兩人份量，令人感覺佢唔歡迎單客。橫掂都係做，點解唔貼心啲，預啲一人份量，啲客試多幾味都會開心啲。
喺我進食期間有一對男女被安排坐我隔籬枱，講晒普通話，應該係自由行。個女人同男人講乜原來係食火鍋，好嘥時間，想食火鍋上面大把，我哋走吧。同侍應話唔食了，然後走咗。咁大家就明點解有番自由行個市都仲係咁差，佢哋就算唔踎喺街邊食杯麵，都只會去快餐店趕喉趕命食個快飯填飽個肚就算，鬼得閒同你食正經飯。大家覺唔覺近排啲自助餐、燒肉、火鍋、放題全部做緊特價？一葉知秋啦！
Post
