瓏門小廚 (Closed)

為咗慳錢，猴子通常都會等到兩點半過後先食飯，因為呢個時段大多數舖頭都會有平啲嘅下午茶餐。今日嚟到呢間瓏門小廚，睇睇餐牌，原來佢哋嘅午市特價餐係由11:00am至4:00pm，以後就算想早少少食飯都可以繼續食平啲。猴子叫咗個魚香茄子餐，HK$46連嘢飲，菜蜜、菊花茶、夏枯草或豆漿係免費嘅，想飲汽水就要加HK$5。另外你亦可以配白飯、菜飯、陽春麵或者米線，猴子今次要咗菜飯。值得一讚嘅係廚師夠快手，等咗大約十分鐘左右就有得食，啱啱炒起嘅茄子，熱呼呼，加上茄子嘅鮮紫色，賣相真係一流，食落口亦係香口嫩滑，不過要小心燙親條脷。至於菜飯就唔係咁夠熱，菜嘅香味亦滲唔到入飯裡面。附送嘅豆漿幾滑，不過豆嘅味道就唔係咁明顯。