鋿晶館

Open Now

Now Closed

朋友突然來電想約我食午飯，臨急臨忙唯有近近地喺附近呢間酒樓搵食，由於未到1點食午飯時間，所以都即時有位，坐低見佢有個午市自選套餐$238可以選三款點心、一款小食同一款粉麵飯，於是決定叫個套餐再加多個點心。首先個粉麵飯就揀咗個黄金球海鮮泡飯，黄金球原來就喺一大嚿球狀嘅飯，外面煎到脆脆似食飯焦嘅口感，入面就喺正常飯嘅口感，湯底喺蕃茄芫茜海鮮湯，海鮮配料就有帶子、蝦同魚，湯好鮮甜，整體十分好味！小食就揀咗個咸菜豬肚，豬肚份量都有唔少又夠淋，但個湯咸菜味唔夠出又唔夠熱。三款點心就揀咗黄沙豬潤腸粉、南翔小籠包同黑椒金錢肚。黃沙豬潤腸粉，豬潤喺切到一條條，腸粉皮唔會太厚，味道ok。南翔小籠包就最出色，咬落去充滿湯汁，一唔小心就會湯汁四濺，味道非常好，另外個黑椒金錢肚就幾惹味，金錢肚下面墊咗幾嚿白蘿蔔，金錢肚夠哂淋又入味，唔錯。另外加咗個意頭點心橫財就手，豬手份量算多，下面有啲花生墊底，豬手稍嫌唔夠淋但味道都唔錯。