鳥棲日本料理 (Closed)

觀塘真係一個好多美食嘅地方，每個月都差不多有新嘅店舖，今日午餐去到駱駝漆大廈覓食—鳥棲日本料理。餐廳內裡裝修簡約，燈光柔和，我地被安排坐梳化位非常舒適，另外入面有個半開放嘅廚房，客人可以睇到廚房內嘅情況。午餐以定食為主，我同朋友選擇咗七味牛肉豆腐鍋定食及蒲燒鰻魚定食，飲品就加錢要咗手調咖啡，我地兩個都揀咗熱及凍嘅玫瑰咖啡。定食包括咗一份新鮮沙律，一碗麵豉湯同飲品。原條蒲燒鰻魚定食原條鰻魚份量足，味道帶點焦香，食落魚肉嫩滑，皮脂算肥美，而且少骨（可以講係食唔到有骨）但因定食關係，魚和飯係分開放，所以醬汁係加係鰻魚上，較難用來拌飯，但勝在鰻魚好味，所以唔差。七味牛肉豆腐鍋定食感覺好似日式家庭料理，豆腐滑溜，牛肉及豆腐滲透晒湯汁好入味，而且有一丁點辣好惹味，用湯汁送飯非常一流。最驚喜嘅係玫瑰咖啡，飲起嚟帶有淡淡的玫瑰花香味，軟綿的奶泡上撒上玫瑰花瓣作點綴，熱飲拉花好靚亦有玫瑰花瓣點綴。提提大家，餐廳有提供bb櫈（供應有限）而且幾靚，非常適合小朋友一同用餐。