壹號漁船 (富萊花園)

Open Now

Now Closed

之前夜晚新開張嚟打個邊爐。今次就飲下午茶。大廳呢邊比起打邊爐嗰邊更加寬敞，加上唔算好多人坐得都幾舒服。呢度點心啲款式都幾特別，大部份啲味道都唔錯，價錢亦都相當合理，係位置有少少隔涉，但係如果想飲茶冇咁嘈都可以考慮嚟呢度。講返啲食物先個腸粉裏面包住啲油炸鬼同埋蝦啲油炸鬼完全冇淋仲係脆卜卜，啲蝦肉又爽。鵝腸嗰份量就少啲，可能呢個係小食㗎關係。但係另外個魷魚唔會揸得太乾身仲好有肉汁。蝦餃燒賣就唔特別講啦，反而想講講佢個牛肉餃，好特別裏便係用咗免治牛肉整嘅，超有肉味，佢又唔似肉醬嘅口感，但係又唔會好似肉碎咁乾身，呢個值得嗌。個腸粉落咗啲蝦米喺度超香口。牛仔骨個量都足，又夠淋但又無梳打粉㗎感覺。可能佢自己做埋打邊爐，個滑牛粥啲牛肉都好嫩滑好夠厚。最後本來想嗌炒粉麵，但係見佢個酸菜魚都唔使$100就叫來試吓。如果鍾意食辣嘅朋友呢個真係超推介，個椒蔴勁搶喉辣得過癮，美中不足係可以酸返少少就正啦。另外個炸豆腐粒都幾特別外脆，裡面嘅豆腐還很嫩滑。