韓食家純豆腐麵店 (Closed)

陪我女人行完街，早小小食個下午茶，因為好遲先食早餐，坦白講，我係唔餓，只想搵個位坐低抖一抖。都話唔知點解女人咁鐘意食韓國野啦，事關今日佢又提議食韓國野。成來兩點，黎到都冇咩人，見冇人招呼我地就自行搵位坐。女人叫左個海鮮辣豆腐湯，我就海鮮辣豆腐湯加左生蠔(52+5)，冇飯冇汽水的，因為真係唔餓。我嗰個上黎先，海鮮一如預期係雪藏野，雖然預左，57蚊想有新鮮海鮮想下好喇，不過雪藏野都可唔可以大粒dd 呀？只有兩隻係中size 既雪蝦，其餘都係發育唔健全既迷你size. 冇鮮味就一定架喇，反而加嗰五蚊既兩隻生蠔就唔錯，起碼係對味，唔算好鮮，但有蠔味。豆腐似係盒裝的百福豆腐既味，食唔係好到豆味，正路野不過好滑溜，個湯仲有d菌類，不過份量唔多。每個湯都有一隻蛋，因為個湯好熱，食到最尾就可以烚到個蛋有流心既感覺，正！最後想講個湯，應該落左好重味精，食既時候唔係好覺，不過食完冇耐就feel到好想飲水，喉嚨好"確"。如果以CP值黎計，整體其實就一般。