伽倻韓國餐廳 (Moved) New Location

好期待的一餐，終於可以去伽耶食啦，佢個menu D相好鬼吸引，真係樣樣都想食。前菜種類好少，6個人只有7碟，每碟分量又少，而且只可refill兩碟，真係唔多夠喉。當中以泡菜最好食，refill o左一次，是我食過韓菜中之最辣的一間，真係好刺激呀。牛肉炒粉絲-粉絲又滑又爽口，味道稍甜。炆牛肋骨-鍋細細，原來份量不少，足夠我們兩件。顏色較淺，但炆得好腍好腍，又甜又勁入味。韓式醬豬手-完全唔肥，有點似燻蹄。海鮮煎餅-size有大有細，我o地叫了個細剛好6個人食。煎得唔夠脆，有少少腍身，口感似蠔仔餅。石頭飯-是我推介之一，因為勁多又脆又大又厚的飯焦，不過飯有少少過腍。辣冷麵-我認為唔算太辣，好多醬汁，蘿蔔、雪梨亦不少，麵身較一般的幼細，較易咬開。湯麵-湯底好清，麵身有點似米線，但較米線彈牙爽口。講番服務方面，真係一流，非常有禮貌，笑容又好、又唔怕麻煩，我要俾5分滿分。平日星期三非常滿座，門口仲有唔少人等位，一定要預先訂食。雖然我o地有6 個人，大家都係細食之人，好多野都試唔到，好期待下一次再食過。