麵 (Closed)

lunch時段好怕喺中環食，所以今日早啲，12點前就走過嚟快快手食個麵先。環境坐得舒適，呢度麵嘅選擇都幾多，本身好想食牛肋骨，不過店員話個湯係辣㗎喎，於是改食叉燒8小時慢煮秘製叉燒炒烏冬 ($88)包前菜及飲品，前菜有沙律，粟米及豆。不過粟米及豆就普通咗啲，就咁罐頭粟米咯。等咗一陣就上菜了，老實說賣相真係好普通，我甚至會用唔靚去形容，以呢度嘅裝潢嚟講，理論上食物嘅賣相唔應該係咁，唔襯！先食一塊叉燒，佢嘅軟稔程度簡直誇張，喺我未真正嘗到佢嘅味道之前，一咬落去已經咬開咗，無牙嘅老人家食都完全冇難度！份量其實都足夠嘅，不過肥瘦唔適中，除咗咬第一塊係偏瘦之外，其餘咁多塊都係偏肥，大概每一塊都係90%肥膏+10%瘦肉，非常可惜，最後食剩好多肥膏。慢煮8個鐘嘅關係所以超級入味，直頭入味過龍添；至於烏冬，雖然都係肥烏冬，不過炒得好乾身，唔係炒到好爛咁樣，仲有啲咬口感，好味！如果啲叉燒唔係咁肥嘅話，咁就完美喇！其實好想好想俾負評，不過見服務真係好好，向佢哋提出咗叉燒好肥之後，店員話會親自向大廚跟進，希望下次再嚟食會有機會食到肥瘦適中嘅靚叉燒啦！