最掂燒味 (Closed)

話說家中大廚罷煮，屋企又無儲糧，懶起上嚟唯有付出代價叫貴貴外賣。其實袋鼠某啲餐廳可能因抽佣關係，外賣既價錢係比堂食貴好多！就講呢份「最掂叉燒瀨粉」袋鼠價$49，堂食價$40；而「果醬甜酸齌」袋鼠價$28，堂食價$18，食物份量仲比起外賣自取既少。至於講番食物味道的確有如餐廳霸氣名稱一樣「掂」，毫無失威！「最掂叉燒瀨粉」叉燒唔會好肥，但又做到保留油香，即使唔食肥膏都唔需要避得咁辛苦。瀨粉夠滑夠香，雖然客人應該多數叫燒味都係跟飯，不過瀨粉都無揸流灘。魔鬼在細節，食碟頭嘢最怕遇到又老又多渣嘅嚡烚烚配菜，好彩餐廳同樣無為慳成本而影響食物整體。「果醬甜酸齌」其實係為叫滿袋鼠最低外送額$85先搭單要的，個名怪怪地，但食落好正常仲幾好味添。嗯......不過一兜仔要$28就下次不了嚕。