滿江紅小甜甜 (Closed)

連續多日都下雨， 天氣潮潮濕濕，係時候搵啲辣嘢食刺激一吓。 去到油麻地接近旺角嗰邊， 遇到《滿江紅小甜甜》。食四川麻辣菜這間口碑唔錯， 店家自砌水庫魚養殖埸和有機農家菜， 可以keep到品牌原材料質素。餐牌有好多水煮系列， 仲有野生水庫魚， 酸菜魚 ，麻辣鍋，乾鍋， 粵式小菜系列都有。餐廳又有好多大圓枱， 中式酒樓格局，適合一大班人 一齊食川菜。前菜有雪菜， 好乾身，冇用油類調味料醃，唔辣， 味道帶少少酸。酸菜桂花魚片 $218(小窩) 揀咗價錢較貴嘅桂花魚片， 魚骨較少而且肉質更香甜嫩滑。 雖則係小鍋但係份量都唔細。 配料極多， 有大量嘅秀珍菇同鮮冬菇， 酸菜方面葉嘅部分偏多， 湯底酸得嚟 好重胡椒同辣味（ 我哋点咗微辣)。 桂花魚片份量亦唔少， 肉質鮮嫩， 酸辣度更提昇其鮮味。 厚切嘅桂花魚片口感又嫩又滑， 非常美味!四川魚香茄子$58保留原本嘅魚香茄子味道但加咗少少麻辣和酸， 味道獨特， 且冇咁油膩。麻辣田雞煲$82用明火㷫住， 又熱又麻又辣， 味覺好刺激。 田雞 屬於中size，肉質結實。 墊菜還有大量青瓜條和薯仔， 不知為何青瓜用麻辣煮完仍有濃濃嘅青瓜味，頗意外。