八妹車仔麵 (Closed)

近呢幾年其實我覺得買車仔麵為主嘅舖頭開始越來越少，可能係因為舖頭需要準備好多唔同種類嘅食材等客人挑選，相比起普通粉面店，不論準備功夫同埋成本都比較多，所以就買少見少 。今日想介紹一間鴨脷洲嘅車仔麵舖頭，等大家有機會過嚟都可以去食下！呢間舖頭其實裝修都有落心思，店舖係想重演返以前街邊賣車仔麵嘅感覺，我覺得都幾得意。佢裏面嘅餸菜都好多選擇，大路嘅各種丸類牛腩豬手雞翼尖，甚至佢哋自家製嘅美味齋滷水雞蛋腩肉都有齊。我呢啲有選擇困難症嘅人，當然就叫多幾個餸去試吓啦！我同同行嘅朋友叫咗一碗貢丸腩肉生根河粉，同埋一碗豬扒魚皮餃牛腩河。河粉入口滑溜，貢丸嘅冬菇味都好突出，滷水豬腩肉略嫌滷水味唔係好夠重，不過勝在大舊，牛腩五香味濃郁都不錯吃。佢嘅豬扒係即時炸起上枱，入口熱辣辣都好香脆。重點推介佢嘅香辣醬，雖然有d辣,但係好香口同埋惹味，配合加入腩汁嘅湯底都係相得益彰，大家如果經過都可以試吓。